雖然大家成日留言第一句都講︰「首先你要……」，淨係睇呢幾隻字都知咩事，咪臭係「首先你要……有個女朋友」！但事實上，又係唔係真係咁恨有另一半陪住你先？似乎事實又唔係咁喎。今時今日唔少男士對戀愛都愈來愈消極，認為與其有個女朋友管住晒，食住自己，不如一句「其實自己一個更開心，使L你講」更加符合國情，起碼去邊都唔使報到，辛辛苦苦賺返嚟嘅錢可以自己使晒，唔使下下幫女朋友埋單，都不知幾自在！

之但係……一個人真係開心咩？真係冇諗過搵個伴咩？日本網站R25就針對4x-5x歲嘅單身漢做調查，發現有超過8成受訪者都表示︰「早知道就結婚啦……」，究竟一路都係「不婚」主義嘅單身漢，喺邊個Moment會有結婚嘅諗法呢？

10位　被人問「做咩仲未結婚」嘅時候
社會總係有無形嘅壓力迫你「某個歲數」就要結婚，如果你到咗「某個歲數」都仲未結婚，就好似係你有問題咁，面對呢種情況，真係寧願「早知道就結婚啦……」，咁就唔使年年都畀人煩。

9位　聽到父母或親朋戚友傾到結婚話題時
喺得你面前講就好明顯係畀說話你聽啦，即係點呀？咪又係催你結婚，唔想畀人煩就真係「早知道就結婚啦……」！

8位　聽到已婚朋友傾家庭生活時
當身邊朋友都進入另一個階段，得返你孤家寡人同唔到佢哋嗒嗲傾家庭之樂，多少係會有啲被冷落嘅寂寞感覺嘅……

7位　想食住家飯時
單身漢唔排除飲食都要靠外賣，而且自己都咁大個人，唔係人人都仲有福氣食媽媽煮嘅飯菜，都剩低自己一個時，都會FF有個老婆為自己煮住家飯。

6位　返到屋企好攰，唔想做家務嘅時候
日日做社畜，返到屋企咁鬼攰仲要做家務掃地摺衫乜乜乜，諗下都覺得攰，如果有個老婆為自己打理家頭細務，放工返到屋企個人都Relax啲啦。

5位　假期無所事事嘅時候
同年紀嘅朋友假期就Family Day，自己就約唔到朋友，仲可能要孤零零自己一個過，的確係幾寂寞。

4位　喺街上見到其他幸福家庭時
就好似情人節出去畀人閃爆咁，對於單身漢而言，幸福家庭其實都相當耀眼。

3位　返到屋企空無一人時
日日返到屋企都冷清清四面牆，不期然會希望有一個有人等待自己嘅家……

2位　諗到自己老年生活時
唔少單身漢受訪時都表示，諗到自己老咗時都係一個人，冇人照顧，冇人陪伴，就好想搵個另一半。

1位　生病時冇人照顧
病已經夠慘，仲要冇人照顧，咩都靠自己，嗰刻的確係幾灰幾無助……