「同前女友關係如何」
呢點可能有啲男士都會在意︰究竟自己另一半而家同佢哋嘅Ex關係點呢？仲有冇聯絡呢？定係Keep住朋友關係呢？關於Ex嘅嘢，不論男女都好，似乎都唔係一個太容易問出口嘅話題，一來自己都唔希望令對方勾起對Ex嘅回憶，二來又怕多口問，另一半會覺得自己疑心重，唔信任佢。不過話晒係同另一半有過親密關係嘅人，就算係得好少資訊，多少都會想八卦問下。

「對自己身體有咩睇法」
男人可能都會好想知，究竟自己副計喺女朋友眼中值幾多分，女人其實都一樣，想知男友點睇自己嘅身體︰會唔會覺得個胸唔夠大？會唔會覺得肚腩好多肉？會唔會覺得皮膚唔夠滑？雖然好似只係好小事，但唔少女仔都會羞於問出口。

「對未來有咩諗法」
有時大家喺埋一齊，可能只係當下感覺好好，未Ready plan好長遠嘅事，但唔少女士都對婚姻充滿憧憬，一齊冇耐已經希望同另一半詳細咁計劃未來嘅藍圖，但好多時候，察覺到男方未有心理準備甚至未諗要結婚，都唔知問唔問好，驚問出口人哋以為自己想迫婚，嚇親人就仲衰。



「對自己嘅烹飪技術有咩感覺」

條女煮嘢食畀你，10個男人10個都實話好味，女人都深知呢啲係必要嘅台詞。但有時候，佢哋心底裡都想聽一個真正嘅答案，想知你係咪真係鍾意食佢煮嘅嘢，話晒知自己衰咩先有進步空間，留得住男人嘅胃，不過男友都講到明話好味，再追問落去似乎又會好煩咁。