Menclub

啊，咪就係iPad Air 2囉，完。

文：MenClub Patrick　　圖：互聯網
POSTED ON October 17, 2014 10:23 am

尋晚Apple發布會，一如預期有iPad Air 2同iPad mini 3登場，well，或者大家都預咗唔會有大變，所以事前對發布會都唔太期待，好少人提，同iPhone 6發布前嘅反應差好遠。事後，今朝瞓醒，facebook啲人都真係講旺角清場多過講iPad，就算講，都係彈兩部機冇好意比較多，同埋話成個發布會似Apple fans自high嘅集會場。真心，最興奮咪係得班果迷囉！不過，成個發布會又唔係一啲驚喜都冇嘅，起碼仲有部27吋嘅新iMac採用5K屏幕，比而家啱啱先開始興嘅4K屏幕再進一步，袋住先啦！

快咗、薄咗、輕咗　iPad Air 2 循例都睇吓iPad Air 2改咗乜啦！之前大家都估會照搬iPhone 6嘅料落去，結果佢真係追加番土豪金色版，又一樣取消32GB容量，改為提供16、64同128GB畀人揀，上代未有嘅Touch ID都終於有了。但喺處理器方面，Apple畀多少少大家，因為係用比iPhone 6嗰粒A8 CPU再快少少嘅A8X CPU，據keynote講運算效能會比上代iPad Air快40%，圖像處理效能更升咗2.5倍咁話喎。不過呢啲數字同《4點鐘梁sir陪你談數據》一樣咁空泛，理論上打機會快咗，但實際有幾快，點都要試過至知。

iPad Air 2個iSight鏡頭亦終於提升到800萬像素同擁有f2.4光圈，兼且支援1,080p/30fps拍片同120fps慢動作攝錄，但相信規格仍未同iPhone 6個鏡頭睇齊。至於屏幕，雖然尺寸同解像度同上代完全一樣，冇upgrade過，都係9.7吋2,048x1,536，但係keynote話原來佢將LCD、touchpad同表層玻璃3塊嘢合一，令中間啲空隙冇晒，減少反射光同提升觸控靈敏度。簡單講，即係靚咗同好篤咗，但都係嗰句，試過至知。好喇，輪到講keynote最主力sell嘅機身厚度！今次iPad Air 2減到6.1mm，比上代再薄咗18%，薄過支鉛筆，係現今全球最薄嘅tablet；重量亦降至437g（Wi-Fi版）同444g（4G版），分別比上代輕咗32g同34g。不過筆者一直覺得太薄嘅tablet，反而唔會好揸，而且多數人都會笠個厚身套嚟用iPad㗎啦，整到咁薄其實有乜謂？

一句講完　iPad mini 3 咁iPad mini 3呢？勁囉，就係加咗Touch ID同金色，完！其他嘢同上代完全一樣，純粹叫做有新一代機繼續賣，比冇乜人留意嘅第3、4代大iPad出得更hea！兩部新iPad更加破天荒即日開始接受預訂，下周出貨，香港都有份，但仲未知今日（10月17日）幾點開放畀人訂機。睇到呢度，你唔係仲想問兩部新iPad炒唔炒得起呀話？死咗條心佢啦！ iPad Air 2售價 Wi-Fi版：16GB $3,888、64GB $4,688、128GB $5,488 Wi-Fi+4G版：16GB $4,888、64GB $5,688、128GB $6,488 iPad mini 3售價 Wi-Fi版：16GB $3,088、64GB $3,888、128GB $4,688 Wi-Fi+4G版：16GB $4,088、64GB $4,888、128GB $5,688

5K搶眼　iMac Retina 5K 至於前面話比較有驚喜嘅27吋iMac，所用嘅5K Retina屏幕，解像度高達5,210x2,880，係之前27吋iMac嘅4倍，同一般Full HD電視機比，更加係7倍。數字真係幾嚇鬼，但應該係執相、剪片等工作用先會需要到咁勁嘅芒，一般用家最多愛嚟睇4K片啫。其他spec.方面，都係目前最top嗰啲電腦規格，唔算太特別，售價由US$2,499起（約$19,440）。但我覺得，iMac其實係咪時候轉轉個樣呢？

另外，Mac mini亦都有新一代發布，但都係update番處理器、顯示卡、Wi-Fi等硬件，只屬普通升級，由US$599起（約$4,660）。軟件方面，除咗正式推出Mac OS X Yosemite之外，Apple仲終於跪低，喺下星期一推出嘅iOS 8.1入面，徇眾要求加番Camera Roll，之前決定唔要嗰個實在抵打。仲有，Apple Pay功能亦會喺下周開放畀人用。