| Hot Toys出RoboCop，出嚟出去都係80年代嘅舊版造型，雖然玩1/6 figure嘅gentleman，年紀的確唔會太細，多數都係睇舊版大，照顧佢哋嘅懷舊情懷都好應份，但其實update出吓2014年新版亦會畀到大家新鮮感啫，冇壞㗎！ 既然Hot Toys未有，不如玩住其他玩具廠出品先。事關threezero已經開發咗新版《鐵甲威龍》figure，比例同樣係1/6，而且睇官圖質素都拍得住Hot Toys出品，擺埋一齊display都冇乜違和感喎。 threezero呢個RoboCop，係根據新版電影入面嘅1.0造型嚟製造，即係俾老闆嫌唔夠「威猛」、比較接近舊版嘅銀色造型，只係一頭一尾亮相過兩次。成個figure高12.5吋，比一般1/6 figure大少少，睇佢一身裝甲嘅塗層都幾細緻像高，冇乜膠味。頭盔內藏LED燈，眼罩條黑線位可發光，合乎期望；兩邊大髀亦跟足設定可以打開收納眩暈槍同機槍，手型則有3對，包括平手、握拳同持槍。 最重要係，上官網預訂嘅話，仲會獲贈限定版Alex Murphy頭雕同可拆卸嘅頭盔面罩。睇佢個頭雕，水準真係可媲美Hot Toys製作，目測同演員Joel Kinnaman有7、8成似，買得呢個figure，冇理由唔要埋，所以記住香港時間10月30日朝早9點要上官網預訂。學RoboCop話齋：「You're Under Arrest」，訂啦！ 售價：$1,780（包郵費） 官網：www.threezerostore.com | |
| |
