| 蝙蝠俠同其他Super Hero最唔同嘅地方，係佢冇超能力，而佢所用嘅武器亦唔似得Iron Man咁高科技，現實中有可能整到出嚟，即係話只要有錢有恆心，人人都可以做蝙蝠俠。就好似住喺澳洲悉尼嘅29歲Batman迷Zac Mihajlovic，足足用咗兩年時間整出呢架1:1嘅1989年版蝙蝠車，仲要俾佢攞到行車証，而家佢可以大搖大擺咁喺澳洲扮Batman四圍去，真係cosplay嘅最高境界！ | |
| |
| Zac Mihajlovic受訪嗰陣，話佢細細個就勁迷蝙蝠俠，之前已經改裝過冇咁像真嘅蝙蝠電單車，最後佢終於癲到想自己整架蝙蝠車出嚟。但原來要買版權喎，直至搞掂晒所有法律問題之後，喺兩年前，本來唔識機械工程嘅佢，就搵嚟退休工程師阿爺幫手，開工打造蝙蝠車。正正因為佢係睇1989年版電影大，所以佢堅持要整呢個版嘅蝙蝠車，而唔整Christopher Nolan版本嗰架。 架車完全照足電影入面嘅尺寸嚟整，有部分零件仲真係喺當年拍戲嗰架道具車度拆出嚟，係幾年前Zac Mihajlovic買嚟收藏嘅。其實複製蝙蝠車，佢都唔係第一架，不過之前嗰啲淨係可以擺喺度觀賞，Zac Mihajlovic呢架係第一架行得走得兼攞正牌嘅。由於架車實在太正，據講有個阿聯酋酋長出到100萬美金想買佢，但係Zac Mihajlovic都唔肯賣。 Zac Mihajlovic仲特別搵咗一間加拿大設計公司，幫佢造咗成套蝙蝠衣，等佢有得cosplay住咁揸蝙蝠車，而且經常全副武裝咁參加慈善活動。佢同真Batman最似嘅，其實係唔等錢使！ | |
| |
