《Assassin's Creed（刺客教條）》系列一直儲落一班捧場客，雖然上集《Black Flag》設定成在大海中殺海盜，老實講我真係麻麻，但早幾個月新一集《Unity》發布時，我一聽到它會變回在陸地上玩暗殺，背景更加係充滿戲劇性的法國大革命時代，就立即有番晒期待。仲要近期撞啱埋雨傘革命，就連官方廣告口號都夠薑打正旗號叫「遍地開花」，實在應景到暈。點都好，玩開玩《AC》系列，冇理由唔玩今集。隻game今日（11月13日）正式派貨，筆者只有時間作初步試玩，不過照樣要寫吓感受。

連線4P合作　動作似Parkour
首先點都要提一提，今集叫得《Unity》，不止故事中人民要團結推翻暴政，就連刺客都要團結。所以玩家除了玩單機模式時扮演主角Arno一個人行動，最大賣點係可以連線與3名其他玩家合作進行暗殺，筆者最期待今集的，就係這種玩法，只可惜今日還未有時間試玩這部分（我班friend亦未放工買game開始玩）。

好了，就先試一試普通的單機玩法。我自己幾鍾意Arno的新武器Phantom Blade，既係袖裏劍，又可以好似弓弩般射出刀片，而且今集亦加強了主角的攀爬動作，經常可以在建築物之間爬上爬落又走來走去，真係有點像源自現代法國的運動Parkour。殺人過程亦相當血腥，啱我個人喜好。

至於劇情，外國有人彈《Unity》故事薄弱兼不合理，或者基於對這系列的喜愛，我仍然覺得可以接受；代入埋香港當前形勢的話，更加會覺得正添！加上由於今集的推出日期delay了兩天，以致今日已經可買到中文版，玩起來能夠完全明白。

5,000 NPC群眾　場面宏大
講到畫質，《Unity》只在PS4、Xbox One兩部新主機及PC平台上推出，畫面果然落過工夫，初步睇細緻度確實比上代有進步，人物、風景及建築物亦算畫得幾精緻，這些方面我收貨。但遊戲另一賣點－－能在同一個場境中出現5,000個NPC群眾，效果則沒有想像中好，人山人海大堆頭的混亂氣紛係有，只不過好多企在大後方的「布景板」人，其實畫得頗為粗糙，一眼就睇得出。

亦疑似因為場景太宏大的緣故，導致了出現遊戲暫時最大的死穴，就是流暢度問題。官方指今集用了全新的Anvil引擎來營造畫面，不知是否到達了PS4及Xbox One兩部新世代主機的極限，所以外國有專業玩家check出遊戲畫面經常少於每秒30格，當中尤以Xbox One版的情況更為嚴重。

畫面達到家用機極限？
還有gamer指出，《Unity》的畫面，其實只有900p，未能達到1,080p的水平，就連潛行系統都似乎有bug，故此對這集遊戲感到失望，更有人狠批它似係未完成趕着推出的遊戲。有高登巴打亦出post聲言要「推到出patch」，強烈要求官方推出修補程式，以改善流暢度不足和有bug的問題。但係亦有意見指，如果係兩部主機的硬件不能負荷《Unity》畫面的話，patch程式也未必能解決問題，難怪PC版對硬件的最低要求都甚高，聽聞就算用幾勁的打機電腦玩，都只能有中規中距的效果。唔通《Unity》畫面真係勁到咁？能否解決這問題，相信係《Unity》會不會大賣的關鍵。

平台：PS4、Xbox One、PC
發行商：Ubisoft
售價：$398/$330（PC）