睇過神劇《求婚大作戰》嘅巴打都一定會對經典插曲《小小戀歌》有印象！睇住山P努力地為愛而跑嘅時候，配上熱血嘅《小小戀歌》，認真冇得輸！不過唔講唔知，其實《小小戀歌》（日語：小さな恋のうた）係沖繩縣出身嘅日本樂隊MONGOL800嘅一首歌曲作品，收錄於該樂隊第2張錄音室專輯《MESSAGE》中，係MONGOL800最具代表性的歌曲之一。而2007年，《小小戀歌》被山下智久同長澤正美主演嘅《求婚大作戰》中，選為與劇情相關嘅插曲後，再一次掀起《小小戀歌》嘅熱潮。

喺上年6月日本就有傳會以《小小戀歌》呢首歌曲作為主題，改編成真人版電影，不過當時未有太多消息透露，估唔到隔咗一年左右再update，發覺《小小戀歌》電影喺今年5月底經已喺日本上映！

聽聞真人電影版《小小戀歌》以一班懷抱住音樂夢嘅沖繩高中生為主角，主要卡司有佐野勇斗、森永悠希、山田杏奈、真榮田鄉敦、鈴木仁等新一代演員。故事講述呢班年青人一直盼望有日可以以音樂跨出沖繩，傳遞到東京。只不過喺一帆風順之際，呢個夢想就被一場車禍所中斷……車禍發生後分崩離析嘅眾人，喺一次機緣巧合下，一齊以「小さな恋のうたバンド（小小戀歌樂團）」名義再次出發。呢次佢哋嘅歌聲唔單只要去到東京，更要傳達畀天堂上嘅好朋友，以及一位隨父母派駐而嚟到日本嘅美國女孩……

雖然《小小戀歌》電影版劇情好似好老套咁，但衝著《小小戀歌》呢首歌，都仲係會好想睇！有冇人知究竟邊度可以睇得返！