奇跡生還

英格蘭聯賽盃第3圈爆出大冷，乙組仔高車士打Colchester United主場面對上季歐聯亞軍熱刺，排名相距70位，前者總身價只有310萬歐元，後者達到9.8億歐元。結果熱刺控球率有75%，射門19次，圍攻90分鐘都入唔到波，比數悶和0:0。互射12碼Lucas Moura和Christian Eriksen宴客，高記險勝4:3晉級，繼上一圈淘汰水晶宮後，連續兩場對英超隊皆奇跡生還！

9人免費

高車士打從未升過上英超，最威是踢過兩季英冠，盃賽歷史也不甚了了。而且11名正選之中，多達9人是夏天免費午餐，射入致勝12碼的Tom Lapslie是剛在專科院校畢業的大學生，全隊身價最高、由劍橋聯加盟的Jevani Brown也僅僅值30萬鎊，只是大部份熱刺球星的零頭，而且呢位人兄仲要在射12碼時貪玩Panenka被撲出，差點成為千古罪人。

陣容唔差

熱刺作出10個變動，17歲的Troy Parrott和20歲的Japhet Tanganga齊齊首次披甲，今季被冷落的Eric Dier同樣首次上陣，但陣容也有Lucas Moura同Dele Alli，之後也派出南韓虎孫興民等主力，咁都輸，根本無藉口，只能怪自己渣、無狀態、唔識射！

賭仔喊晒

普捷天奴自從2013年登陸英超，由修咸頓教到熱刺，從不輕視低組別敵人，過往18場盃賽從未輸過，直到呢日終被高車士打終結不敗身。唔止呀，熱刺累人累物累街坊，外國有個賭仔同日花了1鎊，串了20支球隊過關，本可獲得1.3萬鎊，奧地利盃、阿根廷丁組同英格蘭業餘聯賽都過到，獨獨大「熱」倒灶。

6年輪迴

山水有相逢？2013年7月19日，熱刺作客高車士打的季前熱身賽，當日有份上陣的球員包括Hugo Lloris、Harry Kane、Jermain Defoe等，最終悶和0:0。好衰唔衰，當年熱刺社交網死要面發文：「抱歉，我們在高車士打遇到技術性問題。」6年後輸波就被網民拖出黎翻兜，醜到面爛。但我最想知當年的小編係咪仲做緊，會唔會已經升職到做IT阿頭。