Menclub

玄火 - 盲都射得準過你

文：MenClub 玄火　　
POSTED ON October 29, 2019 6:30 pm

細個踢街場曾被老seafood兜頭兜面鬧「盲都射得準過你」，今日咁講，分分鐘俾人告歧視...但當睇到中國國足贏唔到矮成個頭的菲律賓，國奧不敵10年前正式起步的越南，廣州恒大被日職下游的浦和紅鑽淘汰，那句話，再次在小編的大腦內百轉千回！

今年盲人足球亞洲盃決賽在泰國舉行，中國盲人隊以1:0小勝伊朗盲人隊，，比睇得見的國足更早一步稱霸亞洲，正是「盲都射得準過你」。而且盲人國足於2006年成立，原來已經6次登上亞洲之巔，難怪令人感慨：「中國盲足之所以強，只因見不到金錢，只有純粹的足球。」中國盲足最初只有6人，後來從全國殘疾人運動會羅致8人，組成完整隊伍，2008年北京殘奧拿下銀牌、2010年世錦賽拿得銅牌，2010年亞殘運首次奪金，這次奪冠後亦成功鎖定東京殘奧資格，分分鐘再一次叻過班身體健全但爛蒲爛玩的大帝。可悲的是，盲人隊教練員樂建昆承認，奪冠國家也沒有給予獎金(編按：後來內媒指為樂建昆口誤，亞錦賽奪冠有獎金，只是獎金較少)，盲人球員掛靴，大多只能做盲人按摩。

正常人「有眼睇」就可單腳控球，但盲人足球有種帶波心法，叫「左扣右壓」，左腳發力，右腳輕把球倒向左腳，皮球在左、右腳之間互撞向上，而教練就更加吃力，因教完A球員，XYZ球員是看不到，所以每次教波就要逐個教。同時，盲人足球的球場有一特色，就是劃分了「發聲區域」，龍門後有引導員負責聲音導航，通常是教練和門將。盲人足球的觀眾不能發聲，守門員必須看得見東西，其「提場」的作用尤其重要，而專用皮球內置鐵片、滾珠，藉此在滾動時發出聲響。2015年新華社披露，盲人國足雖包食包住，可是每日只有10蚊人民幣補貼，買煙都唔夠，所以家人都不希望自己的兒子走去踢波。俞裕錟為中國盲人足球開荒牛，2006年以16歲之齡入選，「中學作文寫我的志願，90%同學的志願是按摩師...父母對我也無期望，只願長大後自食其力。」基本上，就算成為足球員，他們都要兼職按摩，個別省隊的每日補貼有50蚊人民幣，已經算多。聽聞，今年盲人國足真是加了「人工」，加到每日100蚊人民幣，如果將來有機會搵盲人按摩，記得畀多少少貼士！