| 如果有睇過Netflix劇《毒臬(NARCOS)》，對於「Escobar」呢個姓應該唔會陌生；冇睇過嘅，簡單話你知就係上世紀七、八十年代，哥倫比亞有個賣白粉賣到成為世界第七大富豪嘅幫會大佬，就叫Pablo Escobar，後來喺1993年被哥倫比亞警方擊斃。而Pablo有個親生大佬Roberto Escobar，當年係幫會做會計，坐咗十年監出返黎就成立咗「Escobar Inc.」，有一系列高調搞作，最新嘅就係出咗呢部「Escobar Fold 1」啦！ | |
| 如果你係去睇佢嘅宣傳片(即係上面呢條)，你好有可能根本就冇為意部機係咩樣，事關條片入面啲內衣女郎係搶眼好多。但如果你有留意下佢個名，你都知呢部電話係曲Mon摺機。目前市面上嘅同級對手係Samsung嘅Galaxy Fold，但韓國大牌賣萬幾銀港紙，Escobar Fold 1最平只需$349美金(約HK$2700)，仲係行Android 9.0、用Qualcomm Snapdargon 64bit 8核處理器、6GB Ram、128GB Rom、7.8吋 AMOLED全高清摺Mon，仲有指紋感應、SD卡糟，睇落非常抵Deal。但值得一提嘅係，Escobar Fold 1嚴格上唔完全係一部摺機，因為即使「摺」埋嘅時候，個摺位都係有一個頗大嘅弧度，個人就覺得叫佢做一部「捲機」會比較適合。 | |
|
|
|
| 點解會平到咁？Roberto Escobar接受訪問時就指，因為佢係跳過分銷同零售，直接於官網出售，所以成本就平好多，售價自然亦可以壓得更低；另外佢仲同電話嘅耐用性非常有信心，指個摺Mon「唔會好似Samsung咁易爛」，因為佢哋個Mon面係「用咗一種好特別嘅膠，我哋隻膠好難打爛」喎。 | |
|
|
|
| Roberto自從成立Escobar Inc.之後非常高調，除咗2016年曾經去信Netflix，話劇集《毒臬》擅自使用Escobar家族的故事而索償十億美金；上年Elon Musk推出噴火槍之後又話人哋偷佢橋，要求一億現金或等值的Tesla股份，否則就會「使用法律程序成為Tesla新CEO」，兩單嘢最後當然都係不了了之。咁究竟呢部Escobar Fold 1係公關花招，定真係Work呢？咁就要睇下有冇勇士買部返黎玩啦。 | |
| escobarinc.com |
