由奇勒基寶及費雯麗主演、1939年上映、贏咗8項奧斯卡、長期佔據百大電影名單頭幾位、計埋通漲係史上最高票房電影嘅《亂世佳人 (Gone With The Wild)》，你冇睇過都一定聽過。但呢部家傳戶曉嘅經典之作，近日卻從HBO嘅網上串流平台「HBO Max」下架，原因？有睇國際新聞你都應該估到啦？

卻說《亂》的故事背景發生於1861年美國南北戰爭前夕，由於本質上佢係一部愛情電影，所以對當年發生嘅事都以浪漫化嘅手法描寫，而當中關於黑人奴隸生活嘅部份近日就倍受批評，指電影美化當時黑奴嘅生活，講到佢哋好開心、對白人家主勁忠心，並且忽略咗當時佢哋生活之艱苦。

《Deadline》引述HBO Max發言人指，「這些帶有種族歧視的描寫在當時是錯，今日也是錯。所以我們認為在沒有提供解釋及批評的情況下繼續播放此電影，是不負責任的。」簡單啲黎講，電影暫時下架後，會加上對當時歷史背景的注解，以及對電影中描寫黑人生活手法的批評，先再上返架，但就唔會對電影本身進行任何改動。

事實上《亂》亦唔係唯一一套受美國近期情勢而影響嘅作品，由1989年播到依家，講述美國警察有幾咁嚴正執法、原定於6月1日播出最新一季嘅紀錄節目《Cops》，亦因此而緊急停播，最後更宣佈不會繼續製作。緊係啦，呢個時候仲播個節目出黎為警察歌功頌德咩，邊有電視台咁戇居架！……咦？