據外媒CNN報導，近日Z世代（1997-2012出生）及Y世代（1981-1996出生）兩代人喺TikTok上鬧得熱哄哄。Z世代表示只有「上一代」人先會著緊身牛仔褲、留側分髮型、就連曾經係全美國最常用嘅Emoji「笑到喊」都被指視為老餅先用。

（圖片截至：CNN）

「笑到喊」呢個Emoji正確名稱為「Face with Tears of Joy」，據Emoji即時用量統計網站Emojitracker資料，「笑到喊」係目前Twitter上最多人用嘅Emoji；喺2017年嗰陣，Apple更曾表示過「笑到喊」係全美國最多人用嘅Emoji。但係Z世代青年近日就喺TikTok表示呢個Emoji早就「過氣（uncool）」，當中21歲後生仔Walid Mohammed表示，我已經好耐無用「笑到喊」，除咗佢之外我所有Emoji都會用，因為我見到只有老餅，例如我阿媽、阿哥家姐同埋上一代人先用。有位女士亦喺TikTok出片話知道自己仔女唔興用「笑到喊」後，自己都少咗用。點知有個15歲後生仔就留言串佢「你應該繼續用，反正我哋就絕對唔會用啦。」

咁時下嘅後生仔興用咩Emoji？據了解，Z世代鍾意用「骷髏頭」去代替笑嘅意思，亦有人會用「大喊」去表示笑到大喊咁解，或索性直接用「LOL（Laugh Out Loud）」或「LMAO（Laugh My Ass Off）」等詞語表示心情。