| Dyson又喺日本發表新款無葉風扇Pure Cool喎，你問個款又係咁嘅樣，同以前嗰啲有乜唔同，又點樣pure法？我可以答你，從外觀上真係唔會睇到分別，事關今次係將風扇同空氣清新機二合一，送風嗰陣幫你過濾埋空氣你都唔會知，又係一件溝埋一齊嘅「瀨尿牛丸」產品嚟㗎！ | |
| |
| 部機點樣過濾空氣？原理好簡單啫！眾所周知Dyson啲無葉風扇係喺機底入風，然後經強勁摩打喺機頂個圈打番啲風出嚟，咁喺摩打前面加多個過濾網咪得囉。不過今次用嘅呢塊，係Dyson全新設計嘅超高密度HEPA濾網，官方話佢能夠過濾到PM 0.1微米嘅懸浮粒子，比一般空氣污染指標可接受嘅PM 2.5再細好多，所以隔絕到99.95%嘅微塵。數字好驚人，但Dyson講嘢你真係要聽，佢哋連轉速快過法拉利引擎嘅吸塵機都整到出嚟㗎嘛！ Dyson Pure Cool會喺4月28日喺日本推出先，有銀同藍兩隻色揀，定價係64,800日円（約$4,213）。想買嘅話，不妨畀多啲feedback J Select，叫佢哋一有行貨就即刻入嚟賣畀大家啦！ | |
| |
