感情嘅嘢好多時都話唔埋，可能你想一拍拍到白頭到老，但另一半未必咁諗，恨不得即刻分手，最Hurt的是，對方連諗個好啲的分手理由都懶，用埋晒啲濕9藉口，真係膠都費時派。

人生流流長，你聽過幾多爛爆的分手理由？下面列舉幾個，睇吓有冇熟口面嘅？

學生時期談戀愛，大部分人都一定聽過呢個分手理由。老老實實，雖則話中學生不應談戀愛，因為會影響學業，但Mean娜眼見身邊唔少朋友，都係中學開始拍拖，一齊溫書一齊努力，仲一齊考到好成績。其實當你求學時愛上一個人，係咪可以選擇一齊努力進步，又或者減少見面專心溫習，真係有必要拋棄對方？OK！散就散，但點解畢咗業唔駛專注學業，結果都唔係同自己一齊先？學業為重喎，吹啦你。

2.忘記不了前男／女朋友

忘記唔到舊愛咁唔該去搵對方，點解仲要同我開始？即係當我係水泡又或者代替品啦？即係我做嘅所有嘢都係廢架啦？最Hurt嘅係你以為呢位情人下次拍拖會同返佢嘅Ex一齊，點知又係同咗其他人。喂！說好的忘不了舊情人呢？！

3.你太好，我配唔起你，你應該搵個更好的人

如果你真心愛對方，而又真係覺得對方太好，咁唔係應該好好珍惜咩？覺得自己唔夠好，配唔上對方，咪努力啲做好自己本份。好並唔係錯，將責任推畀對方，然後自己走咗去，其實好不負責任。講到尾，好人卡都係自己唔愛對方，想分手，又唔想做衰人，先讚到對方天咁高，自己襯唔起。最陰公豬係，有啲人真係以為自己做得太好先畀人飛，結果180度大轉變，要做個壞男人，因為男人不壞，女人不愛。

4.雖然我好愛你，不過都係覺得做朋友更適合

其實如果你講到真係好愛我，係唔會單純做到朋友。既然咁愛，如果大家有咩唔適合，更應該唔啱講到啱，而唔係一邊好愛你，但一邊做朋友咁暖味。講得出要做朋友，老實講即係已經唔愛你，但基於唔想Hurt你，先加句我好愛你。