點樣睇得出一個人係咪虛偽？就係當你問佢「擇偶條件」嘅時候。每次當你問到：「你究竟鍾意咩男/女仔呀？」總有人會答你咩「唔使高富帥、不求白富美，最緊要心地好又相處得到，孝順顧家就夠哂數。」但條友每次都越級挑戰Model級對象，咁你就知佢講嘅嘢有幾咁唔可信！

咁點先可信？叫佢用錢買啦！近日在大陸就瘋傳一個假設性問題：如果你有五蚊去買一個理想男人，你會選擇啲咩特質呢？而其中「帥氣外表」、「忠誠」同「富有」均為價值三蚊嘅高額選項；「身體健壯」同「浪漫」就值兩蚊，而最Cheap嘅就係「幽默風趣」、「聰明機智」同「長得高」，只係值一蚊。

換言之，「靚仔」、「忠心」、「有錢」係不能並存嘅，而如果你掉哂五蚊落去買個大隻靚仔返黎，咁佢就會係好窮啦、好木獨啦、好蠢、好矮但同時又好花心咁啦！

事實上呢個命題唔係要你砌個理想對象咁簡單。實際上佢係逼使啲人為理想對象取捨，黎斷定佢真正嘅擇偶條件。即係如果有人口講自己唔鍾意靚仔，但一嘢就掉三蚊落去要「師氣外表」返黎，咁你就知咩事啦？

你話搞到啲男人好似貨咁，好慘啫！？對唔住呀，你都知喺依家呢個所謂「性別平等」嘅大氣候之下，「男人好慘」呢四隻字係冇市場架啦？再加上其實都有個女版「價目表」，其實好公平架！

最慘係咩？最慘係發現如果有人想買自己，五蚊係有找嘅……「幽默風趣」同「聰明機智」，本文青值兩蚊…嗚嗚嗚……