近年已成香港電影界都市傳說、由Juno 麥俊龍執導嘅電影《風林火山》，上週五終於喺康城影展舉行午夜場首映，Juno以及戲中演員梁家輝、古天樂、高圓圓等更親自現身紅毯。但觀乎首映後嘅網上影評，幾乎一面倒遭到觀眾狠批，情況似乎相當不樂觀。

圖片：截圖自Letterboxd

日前Juno帶領一眾演員現身康城紅毯，入場前焦點在於事先講明唔會出席嘅金城武會否驚喜亮相，結果最終金城武都係繼續缺席。而入場後嘅重點就放於康城觀眾對呢部香港期待已久嘅電影嘅評價，不過情況似乎相當不樂觀。

據全球擁有1700萬名註冊用戶嘅影評網站Letterboxd，《風林火山》過百個評價之中，有超過六成都給出1.5分或以下（5分滿分），整體平均分更只得1.5分左右，而且網民嘅留言都相當辛辣。例如一位畀0.5分嘅法國觀眾就指電影「畫面太難看，劇本難理解，開場45分鐘有過半觀眾離場…是我看過最差的香港驚慄片之一」；另一位英文觀眾就指電影畫面驚人而有趣，但「如果你問我套戲講緊咩，我係唔會知，因為我根本就唔L明發生緊咩事」。

事實上「睇唔明」係影評中最常出現嘅評語，甚至有人表示成套戲睇完，連個人名或者地名都記唔住。另外亦有人指電影充滿太多不必要地臃長嘅對白，以及睇得出用咗好多錢但冇咩意義嘅特效場面。多位觀眾亦提到開場45分鐘左右就有三份一以至一半人離場，而留底嘅觀眾亦因為係午夜場嘅關係，所以有唔少人瞓著咗。

而最多人讚嘅，就係電影有非常靚嘅畫面、美術風格、以及不俗嘅動作場面，但唔少觀眾對於後者亦有保留，表示電影有太多不必要嘅暴力，爆炸亦大到令人難以忍受。

資料來源：Letterboxd