由Ryan Reynolds及Hugh Jackman主演嘅《死侍與狼人》，在去年狂收13.3億美元票房，成為史上最賣座嘅R級電影。有見及此，Ryan Reynolds就希望迪士尼都能夠都拍返套R級《星球大戰》電影，但佢強調唔打親自演出，只想擔任幕後。

最近Ryan Reynolds在Podcast節目《The Box Office》上透露，佢曾經同迪士尼提議過開拍一部R級星戰電影：「我同迪士尼講，點解我哋唔試下拍一部R級《星球大戰》電影？而且唔需要用一線角色，星戰宇宙仲好多其他角色可以選擇。我指嘅R級唔係要粗俗嗰種，而係想用R級嘅自由度去表達更深層嘅情感，係一種傳遞情感嘅『特洛伊木馬』。我成日都諗點解啲大片廠唔敢搏一搏呢？」

Ryan Reynolds繼續表示：「我咁講並唔係我想演呀，我唔係咁合適，我反而想擔監製或編劇等幕後工作。《星球大戰》呢類IP嘅吸引力在於稀有度同驚喜度，雖然Disney+已經有好多星戰作品，令稀有度減低咗，但肯定仲有好多空間可以帶畀觀眾驚喜。」

始於1977年嘅《星球大戰》系列，40多年嚟推出過多部電影、劇集及動畫，但就從未試過R級或TV-MA尺度（即17歲或以下人禁止觀看），要講到最接近R級嘅，應該就係剛剛完結嘅衍生劇集《安多（Andor）》，題材比較成熟同沉重。嚟緊《星球大戰》系列將會有由Pedro Pascal主演嘅《曼達洛人與古古（The Mandalorian and Grogu）》，以及一部由Ryan Gosling主演、《死侍與狼人》導演Shawn Levy執導嘅電影《Star Wars: Starfighter》，各位星戰迷拭目以待吧。