繼《超級瑪利歐兄弟大電影》大獲成功及《薩爾達傳說》真人版電影計劃公開後，任天堂並無打算停低腳步，正準備將更多經典角色搬上大銀幕！

據外媒《IGN》報導，任天堂同環球影業最近為一部名為《Untitled Donkey Kong Project》嘅電影項目註冊版權，意味住曾在《超級瑪利歐兄弟大電影》登埸嘅Donkey Kong將再度重返大銀幕，而且今次仲要係擔正主角。而呢個舉動，亦都間接印證咗任天堂社長古川俊太郎早前在股東大會提到嘅計劃：「公司正積極開發更多影視改編項目，務求讓更多人接觸到任天堂嘅IP。」

除咗《Donkey Kong》電影項目，目前任天堂正同環球影業旗下嘅照明娛樂（Illumination）製作《超級瑪利歐兄弟大電影》續集，預計2026年4月上映。另外，同Sony Pictures合作嘅《薩爾達傳說》真人版電影亦在籌備當中，預計2027年3月上映。睇嚟任天堂真係下定決心要創造一個屬於自己嘅影視宇宙。

順帶一提，Donkey Kong最新遊戲、同時係Switch 2護航作之一嘅《咚奇剛 蕉力全開》將於7月17日正式推出，各位Donkey Kong粉絲千祈唔好錯過。