就算你冇睇過1992年嘅電影《Basic Instinct》（本能），但相信各位對於Sharon Stone於戲內嗰下「無打底嘅繞腳」唔會感到陌生。而黎緊大家或者有機會見到Sharon Stone再繞一次，事關外媒指出Amazon MGM Studios（以下簡稱Amazon）近日以天價搵黎《Basic Instinct》編劇Joe Eszterhas撰寫重啟版嘅劇本，而且Sharon Stone更有望回歸出演！

據《The Wrap》報導，Amazon近日於Joe Eszterhas正式簽約，以200萬美金價格撰寫《Basic Instinct》新續集嘅劇本，而如果最後真係拍得成，Joe Eszterhas會獲得額外200萬分紅，換言之成份報酬可能高達400萬美金，創下今年最貴劇本嘅紀錄。

而年屆80歲嘅Joe Eszterhas似乎亦對計劃非常興奮。佢於回應傳媒查詢嘅聲明中表示：「對於嗰啲質疑一個80歲老人寫咩性感色情驚慄片嘅人：有關我於電影上陽痿嘅傳言係誇大而且係年齡歧視。我有一個叫做『扭曲的小人』嘅寫作拍檔，佢住喺我嘅內心深處。佢生於29歲亦將死於29歲，而佢同我講，要寫呢個劇本佢係興奮到飛上天，而且會為觀眾提供一場狂野而高潮疊起嘅旅程。我聽到都好興奮。」

圖片：IMDB

而據報Sharon Stone亦有望回歸出演Catherine Tramell一角。但考慮到年紀，故事似乎唔會圍繞佢展開，更有可能係作為配角「以老帶新」嘅安排。外媒亦指出Joe Eszterhas寫嘅呢個新劇本，將會係「反覺醒」（Anti-woke）嘅，某程度上係維持1992年電影嘅風格。但問題係當年電影中嘅女性主義、雙性戀等議題，依家已經成為不能亂動嘅「政確」，所以未知佢講嘅「反政確」究竟會點呈現。

《Basic Instinct》於1992年上映後，以不足5000萬成本創下近3億票房，繞腳一幕亦令Sharon Stone成為全球性感標誌。但2006年上映嘅續集（非Joe Eszterhas編劇）票房爆死，7000萬成本僅收回不足4000萬。今次就睇Joe Eszterhas能否再創佳績啦。

資料來源：The Wrap