Glen Powell表示，Chris Pratt在《Guardians of the Galaxy（銀河守護隊）》嘅演出，改善咗荷里活男主角必須嚴肅或陰沉嘅形象，令業界開始接受男主角帶點俏皮同輕浮嘅態度，間接幫佢開闢咗成為電影明星嘅道路。

Glen Powell日前接受《GQ》雜誌訪問時提到，佢出道初期嗰陣，荷里活偏好陰沉或黑暗類型嘅男星，例如Christian Bale同《Twilight（吸血新世紀）》嘅Robert Pattinson，同佢嘅風格格格不入，令佢無法從中找到一席位，但直到Chris Pratt在2014年《Guardians of the Galaxy（銀河守護隊）》嘅演出，徹底改變了一切：「 Chris Pratt喺《Guardians of the Galaxy》嘅突破演出，毫無疑問幫咗我唔少。男主角唔再陰沉黑暗，例如我唔似Christian Bale有種莊重同份量感；Robert Pattinson亦有佢嘅個人風格。然而當Chris Pratt嘅出現，喺鏡頭下作出比較俏皮同輕浮嘅行為時。我覺得非常自在，覺得自己好似擁有荷里活需要嘅嗰種特質，而且呢種特質並唔係好多男演員可以駕馭到。」

如今，Glen Powell已憑住《Top Gun: Maverick 》、《Anyone But You》同《Twisters》成為荷里活炙手可熱嘅男星之一。佢嚟緊仲會化身成動作巨星，主演由Edgar Wright執導嘅新作《The Running Man（逃亡遊戲）》，預計今年11月14日正式上映。