仲有大約一年時間《Avengers: Doomsday》就會上映，除咗電影本身拍得如火如荼之外，關於電影嘅傳聞亦滿天飛。而近日著名荷里活爆料者Daniel Ritchman就提供咗《Doomsday》劇情嘅最新情報，假若屬實的話幾乎連再下一集《Avengers: Secret Wars》嘅劇情都爆埋出黎。就睇大家信唔信啦。

據《Comicbook Movie》等媒體報導，Daniel Ritchman早前於個人Patreon上提供咗有關《Doomsday》嘅最新傳聞，當中嘅重點有兩個。第一就係《Doomsday》會花頗多篇幅描寫《X-Men》電影所在嘅10005號宇宙，與Marvel電影所在嘅616宇宙相撞。於漫畫《Secret Wars》中其實就發生過類似事件，而其中一個解決方法，就係消滅另一個宇宙以避免碰撞，換言之若傳聞屬實，《X-Men》一行人可能會與目前嘅MCU英雄大打出手。

但其實仲有另一個方法「解決」宇宙碰撞，就係將多重宇宙整合成一個單一宇宙，自然就唔會有碰撞問題出現。漫畫中Doctor Doom就係用呢個方法製造出「Battleworld」，並以神嘅身份統治咗呢個宇宙八年，最終被Doctor Strange及神奇四俠等人推翻。無獨有偶，Daniel Ritchman提供嘅第二個情報，就係指由Robert Downey Jr.飾演嘅Doctor Doom，會於《Doomsday》內進行對多重宇宙嘅仇殺(vendetta)。目前唔知佢個「仇」來自啲咩，但假若佢成功，似乎同樣會達成只餘一個宇宙嘅結果。

所以按傳聞黎推測，《Doomsday》似乎會一邊描寫《X-Men》宇宙及616宇宙之間嘅碰撞、兩個宇宙嘅超級英雄為咗求生而對上；另一邊則描述Doctor Doom剷除其他宇宙，最終整合成一個「Battleworld」，曲線解決宇宙碰撞問題兼自己成神。而後續嘅《Secret Wars》就可能講述兩個宇宙嘅英雄放下內部紛爭，共同推翻Doctor Doom嘅統治，並重建多重宇宙。

其實呢個故事線基本上就係漫畫《Secret Wars》嘅劇情，不過就拆開咗兩部電影咁解。唔知各位又滿唔滿意呢？

資料來源：Comicbook Movie