KOEI TECMO今日喺「State of Play」發布會上，正式公布PS2經典遊戲《真·三國無雙2》將推出高畫質復刻版《真·三國無雙2 with 猛將傳 Remastered》，並同步公開咗首條預告片！

2001年推出嘅《真·三國無雙2》，可以話係奠定咗無雙系列嘅基礎，讓玩家能夠控制武將喺廣闊戰場上大殺四方，開創出「一騎當千」式嘅斬殺玩法，承載咗無數玩家青春回憶，相信唔少老玩家都仲記得當年啲弓兵有幾咁變態。事隔20多年後，KOEI TECMO宣布要以Unreal Engine 5引擎復刻呢部經典作品同埋擴充資料片「猛將傳」內容，在保留原作精髓之餘，提供更高畫質及更流暢嘅遊玩體驗。

遊戲預計在2026年3月19日正式登陸PS5、Nintendo Switch/Switch 2、Xbox Series X/S及Steam多個平台，有興趣嘅機迷記得Mark定日子入手重溫經典喇。