最近LEGO推出咗一款Game Boy積木模型，以近乎1:1比例還原初代Game Boy機身，而且全部掣都真係可以撳落去，已經相當令人驚喜。不過，澳洲一位擅長電路設計嘅女機迷，更將呢個模型改裝成一部真係可以玩嘅遊戲機，而且唔係用Raspberry Pi小型電腦搭配模擬器嘅常見方法，而係用上真正嘅Game Boy卡帶同晶片，認真厲害。

LEGO 72046 GAME BOY

自從LEGO宣布要推出「72046 GAME BOY」積木模型後，熱愛改裝GameBoy嘅「Natalie the Nerd」就計劃要動手改造，將呢部模型變成真正可玩嘅遊戲機。為將所有硬件塞得入模型入面，Natalie用上市面最上細嘅螢幕套件，並自行設計咗一塊細過Game Boy卡帶嘅電路板，焊上Game Boy Pocket晶片（因為同原版Game Boy晶片幾乎一樣，而且更平更容易取得），仲加入USB-C接口用作充電。

不過，Natalie表示目前改裝尚未完成，機上嘅按鍵仲未接駁到電路板上，但佢已計劃用3D打印製作專用嘅「Lego磚塊」解決呢個問題。完工之後，佢就會正式分享整個改裝計劃，等有興趣嘅Fans都可以跟住做。有興趣嘅朋友不妨留意住Natalie嘅最新消息。