由獨立電影出身，後來憑Marvel角色「紅女巫」走紅嘅Elizabeth Olsen，近日表明唔會再接拍僅在串流平台上架嘅電影，因為佢覺得電影就應該要喺大銀幕上映。

Elizabeth Olsen日前接受《InStyle》雜誌訪問時提到：「如果一部電影係獨立製作，但後來被串流平台買入嘅話我可以接受；但我唔想拍嗰種一開始就注定僅在串流平台上架嘅電影。我認為大家聚埋喺同一個空間睇戲，感受群眾嘅力量好重要。就好似觀看體育賽事咁，大家為咗同一樣感興趣嘅事情而聚埋一齊，真係超有力量。」佢同時概嘆，自從疫情之後所有嘢都變晒，而家連試鏡都唔使親身出現。

His Three Daughters

自2022年《奇異博士2：失控多元宇宙》之後，Elizabeth Olsen就專注拍攝獨立電影，包括2023年《His Three Daughters》、2024年《The Assessment》，以及即將上映、由A24出品嘅奇幻愛情喜劇《Eternity》。雖然當中嘅《His Three Daughters》由Netflix發行，但為咗符合獎項競逐資格，仍有安排喺部分戲院上映。

Eternity

談到MCU時，Elizabeth Olsen就表示自己非常懷念嗰段日子：「拍Marvel電影好好玩，成班大人好似細路仔喺遊樂場咁，飛嚟飛去、用手發射魔法光波。」並大讚MCU電影最珍貴嘅地方就係有穩定嘅團隊同工作機會：「瘋狂嘅鏡頭走位、特技、特效、視覺效果，全部都需要大量協調。現場過百人為同一個目標努力，能成為其中一份子真係好震撼嘅事。」順帶一提，Elizabeth Olsen早前亦表示，如果有機會佢都樂意回歸MCU。