喺《星球大戰》後傳三部曲飾演「Kylo Ren/Ben Solo」嘅Adam Driver，早前接受訪問時爆料，指自己曾與名導Steven Soderbergh合作開發一部名為《The Hunt for Ben Solo》嘅外傳電影，並獲得Lucasfilm全力支持，但最終被迪士尼高層否決。消息傳出後，唔少星戰迷紛紛發起活動聲援Adam Driver，有人租飛機拉橫額示威、又有人買下紐約百老匯大道廣告牌，要求迪士尼重新考慮。

據外媒《Collider》報導，Ben Solo獨立電影被否決消息傳開後，有Fans就租咗架飛機飛越迪士尼總部上空，拉起印有「Save #TheHuntForBenSolo」字樣嘅橫額示威，吸引大批民眾圍觀打卡。事隔數日後，又有另一位星戰迷買下紐約百老匯大道1500號、著名景點Carlo's Bake Shop上方嘅廣告板，並寫上「獻給Adam。冇人真的離開了（No one's ever really gone）。希望永存，Ben仍活著！ #THBS」

該名Fans接受訪問時表示：「我只係一個普通星戰迷，但我覺得Ben嘅故事仲未完。我哋嘅目的係想向迪士尼表達，呢啲先係Fans真正想要嘅嘢。『冇人真的離開了（No one’s ever really gone）』呢句說話已經說明一切。如果佢哋可以用一句對白令Palpatine復活，咁喺《星球大戰》世界觀入面，要Ben回歸其實有好多合理嘅方法。」

隨住Fans請願活動愈演愈烈，唔知迪士尼會唔會順應「民意」重新推動《The Hunt for Ben Solo》呢？畢竟導演同劇本都已經準備好，就只係差迪士尼點頭開綠橙，各位影迷拭目以待吧。