月中時我哋曾經報導過有傳聞指Tom Cruise打算同緋聞女友Ana de Armas上太空結婚，點知短短兩日後《The Sun》就指二人已經分手，劇情轉折之快唔單止我哋呢啲局外人感到驚訝，連當事人之一嘅Tom Cruise似乎亦大受打擊。據知情人士向外媒透露，Tom Cruise至今都仲未走出被飛陰影，甚至有啲因愛成恨地私下唱衰女方。

據早前《The Sun》嘅報導，Tom Cruise與Ana de Armas分手嘅原因係「火花已逝」，向媒體提供消息嘅知情人士仲話二人關係仍然良好，女方甚至會繼續出演男方嘅下一部電影，換言之就應該係和平分手。

不過近日多間外國小報就指出實情並非如此。據報Tom Cruise本來係想於年尾公開關係（可能就係求婚），但遭到女方拒絕，女方更話自己想要更多空間，於是主動提出分手。據報Tom Cruise自己都對於呢個發展感到非常驚訝，至今都諗唔明點解會突然被飛。相反女方似乎就已經重新適應單身生活，早前仲同朋友一齊出席演唱會，心情似乎無受影響。

正所謂愛得有深、就恨得有幾深。據報Tom Cruise目前正處於一個「崩潰」嘅狀態，一方面質疑女方之前只係靠佢上位，另一方面就不停同人講Ana de Armas配唔上自己，係佢主動話要分手而不是「被飛」，黎緊佢會搵個更有個人魅力及人生經驗嘅另一半。

不過消息人士就指出，當二人打得火熱之時Tom Cruise多次大讚女方可愛、又話對方演技出眾，係一個非常好嘅演員。

資料來源：BLAST