鐵血戰士系列最新作《Predator: Badlands（鐵血戰士：蠻荒廝殺）》上周於全球各地正式上映！呢部以Predator（血獸）首次擔正主角嘅新片，全球開畫勁收8,000萬美元，創下系列近40年以嚟最佳開畫紀錄。

據票房統計網站《Box Office Mojo》資料顯示，《Predator: Badlands》在北美開畫首周末3天勁收4,000萬票房，遠超業界預期嘅2,500萬美元，同時打破2004年《Alien vs. Predator（異獸戰）》北美開畫嘅3,800萬美元紀錄，成為系列史上最佳北美開畫成績。而海外市場亦同樣進帳4,000萬美元，主要票倉包括中國（740萬美元）、英國（320萬美元）及墨西哥（230萬美元），全球開畫票房合共為8,000萬美元。據悉電影製作成本約1.07億美元，以目前嘅勢頭，要回本應該唔係難事。

除咗票房亮麗，電影口碑亦非常唔錯，目前在影評網站爛番茄分別獲得85%新鮮度及95%影迷評分，暫時係全系列中影迷評價最高嘅一部，而IMDb亦有7.6/10分。大多數評論都大讚電影動作場面精彩，保留系列經典元素之餘，又成功拓展出全新世界觀。不過亦有影評人批評電影過於「合家歡」，感覺有啲似Disney+啲粗製濫造《星球大戰》劇集。

《Predator: Badlands》由《Prey（鐵血戰士：狩獵追擊）》導演Dan Trachtenberg執導，並與Patrick Aison再度聯手合寫劇本。故事講述一位被部落驅逐嘅年輕血獸Dek（Dimitrius Schuster-Koloamatangi 飾），前往全宇宙最危險嘅星球展開首次狩獵，目的係殺死當地最強生物「終極掠食者」，藉此向族人證明自己能力，並在過程中意外結識到由科技公司Weyland-Yutani所製造嘅合成人Thia（Elle Fanning 飾），兩人為各自嘅使命而並肩作戰。