Disney+ 昨日於香港迪士尼樂園舉行年度內容發佈會，公佈Disney+自家、以及Hulu、FX等旗下廠牌嘅未來兩年節目。當中去年上線，榮獲戲劇類最佳節目、最佳導演、最佳男、女主角等十八個獎嘅《幕府將軍》（Shogun）確認會續訂第二季；而FX頭牌節目《大熊餐廳》（The Bear）第五季亦確定會於明年上線。

《幕府將軍》男主角兼製作人真田廣之與另外兩位製作人Rachel Kondo及Justin Marks一同現身發佈會。第二季將會有水川麻美、窪田正孝等新面孔加入，Justin Marks笑稱「如果你有睇上季，我哋殺死咗好多角色，咁咪要加返啲新人入去囉！」但台上三人都對第二季發展三緘其口，完全唔肯透露劇情細節，只係話第二季會發生於第一季故事嘅10年之後。真田廣之亦笑稱：「十年後角色老咗，郁得慢咗又靜咗，可能拍得無咁辛苦呢！」

《幕府將軍》第二季將會於明年1月開始於加拿大溫哥華拍攝。目前未有公佈何時開播。

至於FX台柱《大熊餐廳》上季雖然口碑回落，但仍未阻第五季繼續開拍。發佈會上公佈第五季會於明年播出（日子未知），但除此之外就只係為大家重溫過去四集嘅劇情大概，以及播出「Richie」Ebon Che Moss-Bachrach、「Marcus」Lionel Boyce二人預錄嘅影片，多謝大家支持之餘亦保證第五季唔會令大家失望。

資料來源：Disney