由《鏈鋸人》作者藤本樹創作嘅短篇漫畫《驀然回首》，繼去年推出動畫電影版大收旺場後，如今再宣布翻拍成真人版電影！今次更邀請到《小偷家族》、《怪物》日本名導是枝裕和擔任導演、編劇及剪輯，預計2026年正式上映。

《驀然回首》係藤本樹於2021年在漫畫平台「少年Jump+」發表嘅短篇作品，故事講述兩名少女因熱愛創作漫畫而相識，並互相扶持追尋夢想，但後來嘅劇情轉折打動了無數讀者。去年動畫電影版上映後口碑極佳，並在全球斬獲1,270萬美元票房。值得一提嘅係，由於原著只有短短143頁，所以動畫版時長都只有57分鐘，唔知真人版會否同樣「迷你」，定還是會加入更多原創情節拉長戲份呢？

除此之外，真人版亦請到著名攝影師濱田英明負責劇照拍攝，目前官方所公開嘅兩張劇照就出自佢嘅鏡頭，分別係兩位主角在房內專心作畫，以及兩人走在雪地上嘅背影，兩個場面都係原作中相當具代表性嘅場景。據知電影已完成拍攝，現正進行後期剪接；至於兩位女主角由邊位演員擔演，以及具體上映日期，就要等官方後續公布。