《怪奇物語（Stranger Thing）》第五季第2輯自12月26日播出後，整體評分出現明顯下滑，其中第7集「橋（The Bridge）」喺IMDb更只有5.4/10分，創下全系列歷來最低紀錄。唔少網友都將矛頭直指Will喺該集出現嘅「關鍵情節」，批評劇情處理過於刻意，繼而引發大規模負評轟炸。不過，亦有唔少忠實Fans出面力撐，紛紛給予5星好評，試圖為劇集平反、扭轉評分劣勢。

（請注意！以下內容含《怪奇物語》第五季劇透！）

（請注意！以下內容含《怪奇物語》第五季劇透！）

（請注意！以下內容含《怪奇物語》第五季劇透！）

自從第五季第2輯播出後，該劇喺影評網站Rotten Tomatoes嘅爆米花指數（觀眾評分）由原本嘅70％以上急跌至目前嘅56％，意味只有56％嘅觀眾交出3.5/5或更高嘅分數，與前幾季相比落差相當明顯。作為參考，第四季爆米花指數為89％、第三季86％、第二季90％、第一季更高達96％。

而今次負評轟炸嘅導火線，似乎係源自主角Will Byers嘅出櫃情節，第7集「The Bridge」入面有幕提到，主角群同大魔王Vecna決戰前夕，Will叫晒所有朋友們同入房，透過一段長篇獨白承認自己係同性戀，隨後眾人相擁，表達支持與鼓勵。該集目前喺影評網站IMDb上只有5.4/10分，係全劇咁多季之中最低分嘅一集；相比之下，其他集數一般都有8.6至9.2分，即使評價較低嘅集數亦有7.8分。值得一提嘅係，呢集吸引咗超過10.8萬人評分，遠高於其他集數通常約有5萬多人評分，評論亦呈現極端兩極化，大多數觀眾唔係畀10分，就係畀1分，反映出該集爭議性極高。

It’s completely unnecessary and forced on audiences who just want to enjoy some basic sci-fi

— Elon Musk (@elonmusk) December 28, 2025

經常批評影視作品「過度政治正確」嘅Elon Musk亦有喺X回應相關貼文，直言：「呢啲橋段完全冇必要，係夾硬塞畀啲只想睇普通科幻片嘅觀眾。」不過，亦有好多觀眾澄清，佢哋唔係針對Will嘅性取向，況且呢一點其實由第一季開始已經有伏筆，真正不滿嘅係敘事方式過於生硬、節奏太拖，以及劇本處理唔夠成熟。

其中有影評指出：「問題根本同Will係咪同性戀無關，2025年嘅人唔會對此感到震驚，亦唔會因為呢樣嘢而覺得被冒犯。但你冇必要喺世界末日來臨嘅重要關頭，特登停低所有嘢，逐字逐句解釋一啲觀眾一早已經心知肚明嘅角色性格，更加冇必要為咗『表態』而犧牲咗套劇嘅節奏、張力同邏輯，重點係呢個情節對個劇情推進完全冇幫助。呢班細路仔經歷咗咁多混亂同生死關頭，你同我講Will嘅性取向竟然係唯一一個『冇人察覺到』嘅大秘密？」

As a gay person who came out in front of 20 classmates in the 2000s, I felt deeply seen by Will’s confession—sharing his truth with the people he calls family. If it was hard in 2003, I can’t imagine doing it in the 80s, when being gay or lesbian meant surviving a witch hunt.

— Fefe  (@fefe_22) December 27, 2025

但與此同時，亦有Fans喺X發文力撐該幕表現：「作為一個喺2000年代、當住20幾個同學面前出櫃嘅同志，我睇到Will嗰段表白真係覺得好有共鳴。佢係將自己內心最真實嘅一面，分享畀佢視為家人嘅人。如果2003年出櫃都已經咁難，我真係想像唔到喺80年代出櫃會點，因為喺嗰個年代，做Gay或者Lesbian就好似要喺一場獵巫行動入面求生。」

雖然遭到負評轟炸，但《怪奇物語》第五季至今仍備受矚目，第1輯上線僅四周，全球播放量就達到了1.026億次。而長達2小時5分鐘嘅大結局，將於香港時間2026年1月1日上午9點播出。呢部陪伴觀眾近 10 年嘅經典劇集，最終會點樣收尾？會唔會有人犧牲？各位拭目以待吧！