大家都知日本女性非常著重自身打扮，所以連女性時尚雜誌都有非常精細嘅分工，無論係小學生、中學生、大學生、成年人等各個年齡層都可以搵到自己嘅專屬雜誌。而由於每本雜誌都會搵返同讀者咁上下年紀嘅女仔黎做專屬模特兒，所以隨住年齡增長，受歡迎嘅模特兒們都會同讀書一樣會不斷「升班」換雜誌。而今晚要介紹呢位「関谷瑠紀」，就係由小學生雜誌一路「升班」去到著名嘅《Seventeen》，換言之佢一定非常受歡迎！

「関谷瑠紀」出生於2006年8月，早於九歲時佢就已經參加日本經理人公司「Platinum Production」主辦嘅「Shibu3 project」出道。2017年時雖然話想專注學業而退團，但年尾時就走咗去參加出被社「新潮社」嘅小學生時尚雜誌《ニコ☆プチ》嘅模特兒徵選，仲贏埋總冠軍，自此開展佢嘅專屬模特兒生涯。

2020年14歲嘅佢從《ニコ☆プチ》中畢業，轉到同一間出版社嘅中學生時尚雜誌《nicola》，而且好快就成為最受歡迎嘅專屬模特兒之一，多次登上雜誌封面。到2023年17歲時，佢更轉投更出名嘅集英社旗下時尚雜誌《Seventeen》，並一直活動至今。可以話係一代日本少女睇住黎大嘅時尚美女。

除咗做模特兒之外，2019年時佢亦初嘗拍攝電視劇。加入《Seventeen》之後，亦開始踏足面向男性讀者嘅雜誌寫真，並憑清爽短髮、燦爛笑容、白晢嫩膚以及窈窕纖腰引起話題，睇黎好有希望成為新一代男女通殺人氣美女。

IG：ruki_0808