由法國遊戲工作室Sandfall Interactive開發嘅《光與影：33號遠征隊》，可以話係2025年電玩界最大黑馬。遊戲自去年4月推出以來，深受媒體及玩家一致好評，更喺TGA 2025橫掃多個獎項。近日開發團隊就透露已著手籌備下一款作品，並強調將繼續遵循自身創作直覺，專注製作佢哋認為「夠正、夠cool」嘅內容，唔會為迎合Fans期望而刻意改變方向。

Sandfall Interactive營運總監兼製作總監François Meurisse日前接受《Edge》訪問坦言，雖然Fans同評論界對下一款作品嘅期待，確實令到佢感受到一定壓力，但佢同時強調呢種壓力並唔會左右團隊創作：「我哋有足夠嘅時間，專注去製作下一部作品，團隊目前已經有啲好正嘅想法迫不及待去探索。而且我哋嘅起步點已經唔同咗，團隊而家多咗五年經驗，或者可以做出一啲更犀利嘅作品。」

首席編劇Jennifer Svedberg-Yen亦表達類似嘅看法，佢坦言自己本身係「討好型人格」，難免會在意Fans對新作嘅期待同感受，但仍然會堅持自己嘅創作直覺：「如果我話完全冇諗過（Fans們期待）就係假嘅。但創作上，我哋始終會以跟隨自己嘅品味，亦即係我哋認為係cool、我哋鍾意同想睇到嘅內容。我見過太多電視劇集同書藉，為咗迎合大眾而改編風格，結果反而失去咗原本嘅精髓。因此，我覺得我哋需要相信自己嘅創作直覺，並繼續相信工作室背後嘅願景。」

事實亦證明，呢種堅持「做自已」嘅方式確實為《光與影：33號遠征隊》帶嚟成功。遊戲於Golden Joystick Awards 2025同TGA 2025攞獎攞到手軟後，創意總監Guillaume Brocheca亦表示，其實遊戲發售前，團隊所有人都認為「隻Game唔會爆紅，不過會好cool。」最終取得超乎預期嘅成功，令佢覺得相當奇妙。