|
OpenAI日前推出ChatGPT嘅新模式「ChatGPT Health」，主打更安全、更個人化嘅醫療建議，並鼓勵用家接駁個人醫療紀錄同健康App（如 Apple Health等），方便系統作出醫療、健康方面嘅建議。不過OpenAI亦強調，ChatGPT Health並非用於診斷或治療，用家只應將佢當係醫療、健康助手，而非取代正統嘅醫療機構。 |
|
  圖片：OpenAI |
|
|
ChatGPT Health係ChatGPT中一個獨立沙盒式分頁，擁有獨立於其他ChatGPT功能嘅記憶及對話紀錄。OpenAI指出用家可以上傳自己嘅醫療紀錄，以至Apple Health等App紀錄嘅身體狀況，等ChatGPT Health對用家嘅醫療、健康相關提問作出更個人化、更貼合現實嘅回答。例如幫手解釋醫療報告、準備醫療預約、以至提供節食清單或運動建議等。目前ChatGPT開放訂閱用家登記進入等候名單，並會逐步開放使用，最終將推廣至所有訂閱者皆可使用。 縱然OpenAI講到明ChatGPT Health並非用於診斷或治療，但相信大家身邊都有唔少人都由已經「有病問Google」變成依家嘅「有病問AI」，相關嘅情況其實難以避免。過去亦的確發生過用家誤信AI提供嘅資訊而出然健康狀況嘅事，例如8月時就有醫療研究指出，有個男人聽從AI用溴化鈉代替食鹽而被送院。 |
|
|
對此，OpenAI指出佢哋過去兩年搵咗260個醫生，檢視過60萬條、涵蓋超過30個範疇嘅健康相關提問，以協助完善回覆質素。佢哋同時亦強調用咗好多功夫去做模形調較至「有豐富資訊但唔會過於警覺」，以避免「疑病症」，同時有需要時亦會將用家轉向醫療機構。 至於私隱方面，OpenAI亦指會用家與ChatGPT Health嘅對話會有多重（但非端到端）加密，對話亦唔會用作訓練AI模型。而當用家於普通ChatGPT詢問醫療健康相關話題，ChatGPT亦會建議佢哋改用ChatGPT Health以獲得「加強保護」。 |
|