以未來科技諷刺時弊、探討人性黑暗面嘅人氣劇集《Black Mirror》，距離第7季播映完結9個月後，近日官方終於宣布繼訂第8季。唔知今次又會探討咩問題呢？

Charlie Brooker

Charlie Brooker日前透過Netlfix官方粉絲網站《Tudum》透露，《Black Mirror》即將回歸，而且希望新一季會比以往更加Black Mirror。同時笑言現實世界正逐步追上劇集所描繪嘅瘋狂未來：「好彩呢部劇集仲有未來，而且時間啱啱好﹐趕得切喺現實世界追過劇情之前出街，所以都幾令人興奮。我個腦負責度橋嗰part已經開咗機，現正高速運轉，構思下季故事。」

至於新一季嘅創作方向，Charlie Brooker雖然未有透露具體細節，但就將創作過程比喻成製作一張音樂專輯：「構思新故事嗰陣，用呢個角度去諗係好有幫助。我成日都會諗：『有咩係我哋未做過？想要咩Tone？......呢首歌喺隻碟入面排第幾？我哋想玩咩音樂風格？』大家拭目以待吧。」不過佢亦叫觀眾唔使擔心，大家唔會見到《Black Mirror》突然變鄉村音樂舞會（hoedown）風格。

《Black Mirror》第7季自去年4月上架後，成功擺脫第6季評價好壞參半嘅頹勢，回歸系列科技同反烏托邦題材而備受讚賞，更首次入圍金球獎（Golden Globes），角逐「最佳迷你劇集及電視電影」。官方目前尚未公布第8季播出日期，希望今次唔使等太耐啦。