|
美國近年不斷收緊移民政策，好似早前就宣布對境外首次申請 H-1B工作簽證者收取10萬美元費用，換言之外國人想去美國打工都唔係咁易。但近日就有媒體報導指出，近年越黎越多網紅、創作者、甚至Onlyfans模特兒憑住網上人氣成功申請美國嘅「O-1簽證」，相關數字過去10年升咗50%。換言之做網紅可能係目前最易移居美國嘅方法之一。 |
|
|
美國當局對O-1簽證嘅定義  圖片：USCIS |
|
|
所謂「O-1簽證」係一種非移民工作簽證，其下分成專為「於科學、教育、商業或體育領域具有傑出能力人士」而設嘅O-1A，以及針對「於藝術領域有傑出能力，或於電視、電影行業有非凡成就人士」嘅O-1B。而據《Financial Times》報導，過去10年間O-1簽證申請人數增長咗50%，其中有好一部份都係申請O-1B嘅網紅及內容創作者。而佢哋就係靠社交媒體嘅追蹤人數、觀看次數，以至Onlyfans或類似平台帶來嘅收入為佐證，說服美國移民局佢哋係「有傑出能力或成就」嘅人而獲批。 例如現年25歲嘅加拿大網紅「Julia Ain」於接受《The Guardian》訪問時，就坦言2023年申請O-1簽證時嘅文件中，「有一部份係『我喺呢個App有20萬追蹤、嗰個App有30萬、每個月有1000萬人睇我』。」但佢強調唔係「有條爆紅片就得」，而係要證明「有一班忠實Fans，佢哋單止會睇你，而且仲會畀錢睇你。」最終佢因為得到Fans內容販售平台「Fanfix」（類似Onlyfans但無成人內容）贊助而成功申請O-1簽證。而俄羅斯以色列混血國際象棋棋手兼創作者「Dina Belenkaya」，於2023年成功申請O-1簽證時，亦係列出社交平台上嘅追縱人數作為「傑出能力及成就」嘅證據。 |
|
|
Julia Ain  圖片：https://www.facebook.com/profile.php?id=100088869781859 Dina Belenkaya  圖片：Wikicommons |
|
|
由於以往O-1B簽證係畀國際影視巨星、音樂家申請，但依家就變咗一班網紅甚至Onlyfans模特兒獲得，所以唔少人都視為一種退步。如美國政治分析師兼作家「Dominic Michael」就指呢種趨勢係「帝國末期象徵，令人感到悲哀。」 不過亦有人持反對意見。好似曾經幫球王比利申請美國簽證、爸爸於70年代幫John Lennon打過驅逐出境官司嘅律師「Michael Wildes」就表示，創作者經濟係「美國例外主義」（American exceptionalism，即美國係世界獨有國家）嘅前驅，「網紅們正填補零售及商業利益中嘅巨大空缺，佢哋以前所未見嘅方法推動內容及消費，而移民政策需要跟上。」 Julia Ain亦反對「網紅不是正式工作」嘅言論，表示「你可以唔同意呢種搵錢方式，亦可以唔同意人哋睇緊嘅內容，但真係有人睇緊，仲畀緊錢添」、「或者50年前嘅人唔會認為呢種係『美國夢』，但依家嘅『美國夢』就係咁樣。」 |
|