唔少人上YouTube除咗睇片，仲會收聽清談節目、專訪甚至網上課程，有時為慳時間都將播放速度較去1.25倍或1.5倍。不過，最近有網民發現YouTube似乎正進行一項測試，打算將一向免費嘅「播放速度」功能變成Premium用戶專屬福利。如果最終真係推出，將來各位想加速或者慢速睇片，可能就要準時交月費喇。

據外媒《androidauthority》報導，最近有Reddit網民發現，YouTube疑似低調地進行一項新A/B測試，將用戶分成兩組：A組用戶可以繼續免費使用播放速度功能，而B組用戶就會被要求加入YouTube Premium，才能調校播放速度。該名網民透露，自己係因為有兩個帳號先發現呢個測試，佢其中一個帳號仍可免費加速播放，但另一個帳號就彈出提示，要求訂閱Premium先可以使用相關功能。

官方暫時未有就今次測試發表聲明，不過YouTube一向都有進行小規模實驗嘅慣例，先觀察數據再決定是否全面推行。例如之前就測試過將4K解像度播放短暫設為Premium限定，以及已經正式推行嘅「1080p Premium」高碼率版本。與此同時，YouTube亦持續加強打擊廣告攔截器（AdBlock）以及非同住家庭帳號，目的都係想推高Premium訂閱收入。

同所有A/B測試一樣，「播放速度」功能最終會否變成Premium專屬，仍有待實驗結果出爐，要睇下有幾多人會因此而乖乖課金，又有幾多人會堅持唔肯畀錢。不過，呢個舉動已經反映出YouTube正考慮緊將呢個基本功能納入收費範圍之內。