農曆新年將至，唔少人都會喺屋企貼揮春，一般都離唔開「福」字、財神或者生肖公仔，但最近中國社交平台就突然興起一股「魔法風」，唔少網民竟然改貼《哈利波特》反派角色馬份（Draco Malfoy）！全因佢喺大陸嘅譯名叫「馬爾福」，個「馬」字應節之餘，個「福」字又代表福氣，結果令呢位史萊哲林壞學生搖身一變，成為今年新興嘅賀年吉祥物。

究竟係邊個將馬份同新年撈埋一齊已經無從考究，但呢個無厘頭嘅食字gag就成功hit中唔少大陸網民，喺淘寶甚至有商家順勢推出印有馬份招牌「寸嘴」樣嘅揮春、手機殼及同磁石貼等周邊產品。最抵死係，有人仲跟足傳統習俗，將馬份張相倒轉貼，取其諧音「福（馬爾福）到」，真係諗頭多多。

呢股熱潮亦引起CNN及BBC等國際媒體關注及報導，而本尊Tom Felton亦有喺Instagram Story轉載相關報導。相信連佢都估唔到，自己竟然會變左農曆新年嘅吉祥物。