繼《黑神話：悟空》大獲成功後，中國遊戲廠商遊戲科學（Game Science）今日公開新作《黑神話：鍾馗》首條引擎實機短片（In-Engine Footage），率先向機迷拜個早年。不過片段入面並無展示遊戲任何玩法、操作、打鬥，甚至連鍾馗都見唔到，反而係帶大家走入廚房，欣賞一場充滿獵奇風味嘅「地獄料理Show」。

呢段長達6分鐘嘅引擎實機短片（In-Engine Footage，即係畫面由遊戲引擎即時渲染出嚟，並非預先整好嘅CGI影片。），內容主要描繪一位神秘女士喺廚房煮食嘅過程，由切菜、調味、炒煮到最後上碟，每個步驟都鉅細無遺。不過佢所用嘅「食材」就相當重口味，猶如《山海經》中嘅各種奇珍異獸，包括人臉魚身嘅生物、縮喺巨型蚌殼入面嘅老人、生滿眼球嘅肉塊，甚至喺一隻BB妖怪背脊上取下類似韭菜或蔥嘅植物。與此同時，片中亦有兩名妖怪喺廚房行嚟走去，幫手遞食材、準備廚具。雖然實際資訊唔多，但就側面展示出遊戲獨特嘅世界觀及怪物設計，同時呼應民間傳說中「鍾馗食鬼」嘅典故。

雖然官方喺片尾強調，短片純粹係為馬年春節專門錄製，內容與遊戲實際劇情無關，叫大家切勿輕信。遊戲科學創始人馮驥亦喺微博補充，話條片純粹係想娛樂下大家，能令Fans感到驚喜中混合一絲怪異、溫馨中帶幾分獵奇，佢就已經相當滿足，呼籲大家無須太過嚴肅。不過網民又點會咁聽話，目前網上已經有唔少人開始分析片中每個細節隱喻，試圖喺呢餐「九大簋」入面搵出新作嘅蛛絲馬跡。