隨住Netflix真人版《ONE PIECE》第2季將於下月播出，官方今日終於公開正式預告！草帽海賊團將正式駛入「偉大航道」，探索更多奇特島嶼、迎接更兇猛嘅敵人。

從預告可以，Netflix今次明顯更加「揼本」，製作規模明顯比上季更加龐大。路飛一行人將離開東海，乘坐梅利號衝上顛倒山，正式踏入偉大航道，先後登上有巨型恐龍同巨人族出沒嘅小花園、白雪紛飛嘅圓鼓屋頂島，以及充滿沙漠風情嘅「雪花石膏王國（阿拉巴斯坦）」。而以CGI呈現嘅索柏（喬巴）亦有更多畫面，毛茸茸質感保留咗原作嘅可愛魅力，只可惜片中未有清楚展現佢嘅變身戰鬥形態。而由俄羅斯女星Lera Abova飾演嘅「Miss ALL星期天」妮歌·魯賓亦相當吸睛，造型還原度極高，唔少網民都大讚選角對辦。

與此同時，原作者尾田榮一郎亦親筆寫信慶祝新一季到來。尾田於信中表示：「第一季建立嘅所有常規將會被徹底打破。形形色色嘅惡魔果實能力者、前所未見嘅巨人族、超得意嘅生物、拳拳到肉嘅動作場面，加埋超震撼嘅特效。今季亮點多到數唔晒！快啲投入呢個真人版獨有嘅沉浸式體驗啦。」《ONE PIECE》第2季將於3月10日正式上架，全季共8集，各位海賊迷記得Mark實日子喇。