「天使臉孔魔鬼身材」呢句嘢，係我細個時啲報誌雜誌用黎形容樣靚身材正嘅女星，後來用得太多太濫反而變得老土，到近年已經無咩人會再用。但呢個咁老土嘅形容詞，近日就被日本媒體拎設出黎用喺今晚介紹嘅呢位「天羽希純」身上，或者就證明佢嘅樣貌身材的確係一絕。咁就帶大家睇下佢究竟有幾「天使」、有幾「魔鬼」啦！

現年29歲嘅「天羽希純」早於16、7歲就已經出道，當時嘅佢以「伊藤 みう」之名加入偶像女團「ぱー研！」，可惜加入後不足一年團體就宣佈解散，往後數年間換咗9個不同嘅團體，連名字都於2017年換成依家嘅「天羽希純」。其事業轉機發生於2019年，當時仲喺「READY TO KISS」嘅佢推出首隻寫真DVD，結果一出就已經賣哂，特典見面會參加人數仲多到要換場地繼續舉行，成功為佢打響名堂。

雖然「READY TO KISS」最後都係要解散，不過佢好快就加入新團體「#2i2」，並於團體「全員寫真」嘅策略下繼續寫真活動。其人氣亦隨住不停推出雜誌寫真、寫真DVD及實體寫真集而節節上升，至今已經係寫真界最當紅嘅女星之一。

回到標題，「天使臉孔」大家自己有眼睇我就唔多講，「魔鬼身材」呢方面反而可以講下。「天羽希純」早年一直都標榜自己嘅身材係「適乳」，亦即「大小剛剛好」，據佢自己講就係「C.5 Cup」，即係介乎C與D之間。不過近年有報導指佢上圍其實係「G」，同佢報稱嘅差咗3.5個字母；睇佢平時於社交媒體頻頻發放嘅福利照，亦絕對唔至C Cup咁簡單——大小唔係重點，重點係佢講大話呃人呀嘛！咁都算係「魔鬼」嘅行為啦下嘛？

IG：amaukisumi