繼早前首回預告令大家眼前一亮後，《Mortal Kombat II》今日再公開全新預告，進一步曝光更多劇情、格鬥場面同埋招牌終結技，預計今年5月正式上映！

從預告可見，今集主角光環完全落喺由Karl Urban飾演嘅Johnny Cage身上。劇情講述呢位過氣動作巨星被Raiden同Sonya Blade「徵召」，帶領Earthrealm（地球界）參加死亡格鬥大會。相比之下，上集備受爭議嘅原創主角Cole Young（Lewis Tan 飾）雖然都有份出場，但明顯已淪為配角。官方似乎終於意識到，與其硬推一個性格沉悶、欠缺共鳴嘅原創角色，不如將重心放返喺真正有人氣嘅原著經典角色身上，順應民意換Johnny Cage做主角。

除咗確認Johnny Cage擔大旗，預告亦展示咗更多大反派Shao Kahn（Martyn Ford 飾）嘅鏡頭，而Kitana、Jade同Quan Chi等經典角色亦相繼登場，陣容比上集豪華得多。 另外，Scorpion同Sub-Zero嘅宿怨亦會延續，而且Sub-Zero今集將會以幽靈形態「Noob Saibot」回歸！

導演Simon McQuoid早前喺紐約動漫展表示，今集目標係將首集獲一致好評嘅「開頭Scorpion對Sub-Zero」戲碼風格，擴展成一套長片嘅規模。編劇Jeremy Slater亦透露，今集打鬥場面數量會係上集嘅兩倍，而且當角色唔喺擂台比賽嗰陣，亦會有各自嘅「任務與冒險」，令成個世界觀更完整。電影將於今年5月8日於美國正式上映，預計香港都係差唔多時間上畫。