雖然《Game of Thrones（權力遊戲）》正傳已完結多年，但華納兄弟一直積極開發更多衍生作品。最近就有消息指，華納兄弟正在籌備一部《Game of Thrones》電影版，並邀請到Netflix人氣劇集《House of Cards（紙牌屋）》主創兼編劇Beau Willimon操刀，帶領觀眾回到正傳300年前，見證Targaryen家族開創者Aegon I（伊耿一世）嘅起源故事。

據外媒《Page Six Hollywood》報導，《House of Cards》主創兼《Andor》編劇Beau Willimon已經提交咗劇本初稿，而華納高層睇完後亦對此感到非常滿意。雖然目前尚未確定導演人選及演員陣容，但據悉呢電影將會係一部前傳作品，背景設定在正傳故事300年前，講述Targaryen（坦格利安）家族創始人Aegon I（伊耿一世），如何帶領帶領飛龍大軍橫跨大海，血腥征服及統一Westeros大陸嘅傳奇事蹟。消息人士特別提到：「成個《Game of Thrones》嘅故事都係源自於佢，但觀眾從來未喺任何影視作品入面見過佢嘅真身。」

不過，呢個項目最終能否順利投產，目前仍存在好大變數。事關派拉蒙天舞（Paramount Skydance）正著手收購華納兄弟探索（WBD），業界有悲觀聲音認為，喺監管審批程序完成之前，華納大部分開發中嘅項目可能會被「雪藏」甚至被新管理層腰斬。但亦有樂觀派指出，華納為維持電影產量同市場競爭力，絕對唔會停低腳步，加上《Game of Thrones》係公司嘅王牌IP，而派拉蒙CEO David Ellison亦曾承諾，合併後每年要推出30部院線電影，極需要呢類重量級大作撐場。

唔知大家又期唔期待喺大銀幕上，見到Aegon I騎住巨龍征戰四方嘅場面呢？