為慶祝《ONE PIECE》漫畫全球累計發行量突破6億冊，官方日前搞咗個特別企劃。由作者尾田榮一郎親筆寫低「ONE PIECE究竟係咩」同埋路飛身世嘅真相，然後將呢張紙嘅下半部分封存喺寶箱，再掉入651公尺深嘅深海！各位Fans係咪好想即刻租架潛水艇落去尋寶呢？

隨住漫畫單行本全球發行量突破6億大關，官方日前喺YouTube公開咗一段特別宣傳片。片中可以見到尾田榮一郎親自落筆，喺一張紙上面寫低所有海賊迷等咗廿幾年最想知嘅兩大謎團：「ONE PIECE是什麼..」以及「蒙其·D·路飛是誰...」。

最抵死嘅係，尾田將張紙撕開兩半，印有上半部問題嘅原始影印本，就登咗喺日本《讀賣新聞》同《朝日新聞》嘅頭版廣告度；而寫滿「真相」嘅下半部，就連同一個實體寶箱，沉咗落深達651米嘅海底！官方表示，呢個裝住大秘寶嘅寶箱會一直留喺深海，直到《ONE PIECE》漫畫正式完結嗰陣先會重見天日，到時先會向全世界公開裡面嘅終極秘密。

官方特別強調，今次企劃係喺有關部門監修下完成，對裝置嘅設置、回收及拍攝方法都進行了充分研討，並考量海洋生態影響等環境保護的前提下完成拍攝，簡單嚟講即係完全符合環保與法規要求。

資料來源：one-piece.com