講起《God of War》，大家即刻諗起嘅可能都係「殘忍、暴力、血腥」呢啲關鍵字，但有玩過原版三部曲嘅玩家，應該記得入面仲有個頗為露骨嘅「性愛小遊戲」（做完仲可以拎到經驗添）。而隨住Sony早前宣佈將會重製《God of War》原版三部曲，亦開始有人討論當中嘅「性愛小遊戲」會否被保留，畢竟睇落就係一班男開發者嘅「自肥」結果。但《God of War Ragnarök》遊戲編劇、本身都係女性嘅Alanah Pearce近日接受訪問時就指，呢個「性愛小遊戲」其實係一群女設計師嘅傑作，仲話人哋對於設計「非常自豪，覺得好L有型」，打破咗外界對於小遊戲嘅偏見。

Alanah Pearce

圖片：Wikicommons

《God of War》中的性愛小遊戲

話說自第一集《God of War》開始，就已經有所謂「性愛小遊戲」，大致上都係Kratos遇到上身裸露、瞓喺床上嘅女角，玩家上前互動就會出現QTE，同時鏡頭會移開，並隨玩家按鈕出現震動以及呻吟聲，「完事」之後Kratos會收到一大堆經驗。坦白講呢個小遊戲同劇情基本毫無關連，啲女角大多亦唔會再出現，睇落的確似係一群「麻甩佬」興之所至加入去嘅「惡趣味」。

不過據2020年加入Sonta Monica Studio、曾負責《God of War Ragnarök》故事嘅Alanah Pearce指出，呢啲「性愛小遊戲」其實大多係由女性設計師負責，而且仲主動加入更多女性元素。例如《God of War 3》中與女神阿芙洛狄忒嘅「小遊戲」，個房間設計就係刻意模仿女性下體。而且Alanah表示曾經與其中一位女設計師合作過，對方講起呢個設計時「非常自豪，成件事好L有型！」

《God of War 3》中與女神阿芙洛狄忒嘅「小遊戲」片段

阿芙洛狄忒房間設計

Alanah亦進一步談到「性愛」元素於遊戲界嘅尷尬位置：「性愛明明係生活嘅一部份，但到咗遊戲，大家都唔敢將其當係遊戲機制一部份進行討論，因為佢哋諗到要動畫師要整、演員要演，要好多人配合先可以整到呢個互動性愛場面，大家都覺得尷尬。」但佢本人就大力支持《God of War》重製版要保留「性愛小遊戲」：「我承認佢哋睇落去有啲好笑，但我認為佢哋應該在重製版中保留，佢哋屬於遊戲當中。」同時佢亦反對大家話「性愛小遊戲」係「不尊重女性」，反而認為係「對Kratos作為一個人嘅批判，顯示佢嘅憤怒令佢難以被滿足」，而且「服務於Kratos最終踏上的旅程。」

至於最終《God of War》重製版中會否保留「性愛小遊戲」，大概就要等到遊戲推出先知。但考慮到Kratos「不畏強權」嘅性格，假如遊戲真係向「政確」屈服，某程度上都算係一種諷刺。

資料來源：Eurogamer