平時上網想試用新AI，最谷氣就係見到「不支援你的地區」呢句說話。不過好消息終於嚟喇，Google今日正式宣佈，將會逐步向香港所有用戶開放Gemini服務，意味大家以後唔使再四處搵VPN，都可以直接使用呢個強大嘅AI助手！

回顧過去，香港用家想用Gemini其實相當麻煩，除咗企業版Workspace用戶可以免VPN直連Gemini之外，一般個人版用家想玩就必須要長開VPN，麻煩之餘仲要畀多舊錢買VPN服務。而家Google終於宣佈，Gemini將會正式向香港全面開放，首階段會先推出網頁版（web app），之後再逐步支援手機App，不過暫時就未公布確實推出時間。可以肯定嘅係，香港用戶日後終於可以直接體驗Google嘅多模態AI模型，無論係幫手撰寫電郵、規劃旅遊行程，甚至透過文字、圖像同語音生成各種多媒體內容，通通都可以用得到。

對於一眾學生哥同打工仔嚟講，多一個免費又唔使靠VPN嘅AI工具，絕對係好消息。再加上唔少人平時工作同做功課都習慣用Google Docs、Gmail同Drive，如果日後Gemini能夠同Google生態圈深度整合，幫手一條龍整理資料、處理電郵同安排行程，工作效率相信會再上一層樓。而原本用開VPN連ChatGPT、又或者用開Gork、Perplexity、Poe嘅用家，又唔會考慮轉會Gemini呢？