曾出演《Top Gun》及《Batman Forever》等經典電影嘅美國男星Val Kilmer，雖然喺去年4月因病離世，令無數影迷大感惋惜，但最近有消息指，佢將會喺一部全新獨立電影《As Deep as the Grave》中「復活」參演！至於死後點樣再拍戲？答案就係近年喺影視圈引起極大爭議嘅AI技術。

據外媒《Variety》報導，呢部名由Coerte Voorhees執導嘅電影，其實早於Val Kilmer離世前5年已邀請佢參演，並安排佢飾演一位擁有美國原住民血統嘅天主教神父Father Fintan。但可惜當時Val Kilmer飽受喉癌折磨，加上疫情延誤，最終未踏入過片場半步就與世長辭。導演表示：「呢個角色根本係為佢度身訂造，結合咗佢嘅原住民血統同對美國西南部嘅熱愛。我哋當時連通告單（call sheet）都出埋，但佢真係經歷緊一個非常艱難嘅時期，無法出演。」

雖然Val Kilmer未有親自拍攝過任何一個鏡頭，但導演並冇放棄呢個計劃，反而決定聯同Val Kilmer遺產管理委員會合作，利用最先進嘅生成式AI技術將佢「復活」。製作團隊收集咗Val Kilmer生前各個時期嘅影像同聲音數據，重新建構出角色喺唔同年齡階段嘅外貌，甚至連佢因氣管手術而受損嘅聲線都一併還原。雖然用AI「復活」已故演員一向備受道德爭議，但導演強調今次計劃得到Val Kilmer一對仔女Mercedes同Jack全力支持，並指：「佢哋一直強調爸爸有幾重視呢部戲，而且Val生前都好想參與其中。雖然有人會覺得做法有爭議，但呢個確實係Val嘅遺願。」與此同時，電影亦嚴格遵守SAG（美國演員工會）相關指引，並向其家屬支付合理報酬。

《As Deep as the Grave》改編自真實歷史，故事講述美國考古學家Ann Morris同Earl Morris當年喺亞利桑那州謝伊峽谷（Canyon de Chelly）進行嘅艱辛挖掘工作，致力追溯同還原納瓦霍族（Navajo）原住民嘅深遠歷史。除咗Val Kilmer，演員陣容包括Abigail Lawrie、Tom Felton（冇錯，就係《哈利波特》嗰位馬份）、Wes Studi及Abigail Breslin等人。唔知大家又點睇用AI技術「復活」演員？你又會唔會想見到已故偶像以呢種方式推出新作？