自從HBO劇集版《哈利波特》宣布由英國男星Paapa Essiedu出演新任「石內卜」後，因為其非裔身分同原作設定嘅白人形象有所出入，引發唔少爭議。最近Paapa Essiedu接受訪問時透露，佢因為接演呢個角色而收到帶有種族歧視嘅死亡恐嚇，但佢強調唔會退縮，反而將呢啲負面聲音轉化為動力，令佢更熱衷將呢個角色塑造成屬於自己嘅石內卜。

憑劇集《I May Destroy You》走紅嘅Paapa Essiedu日前接受《The Times》訪問時坦言，自從官方宣布由佢接棒已故男星Alan Rickman飾演石內卜後，網上就出現大量惡意攻擊：「有人同我講：『一係辭演，一係我殺咗你。』如果我打開Instagram，就會見到有人留言話要嚟我屋企殺我。」

雖然佢唔認為自己真係會有生命危險，但就認為任何人都唔應該因為工作而遭遇呢種對待：「好多人都要冒住生命危險工作，而我只係喺《哈利波特》入面飾演一個巫師。如果我話呢啲事對我情緒冇影響，絕對係呃人嘅。」對於有人提議佢遠離社交媒體，佢亦無奈表示：「就算你成功無視佢，唔代表件事唔存在，而且身邊啲人見到，都會傳訊息問我是否安好。」至於會唔會報警，佢就認為將一個17歲嘅o靚仔拉去坐兩個禮拜監，並唔會令佢覺得舒服啲。

面對極端Fans嘅恐嚇，Paapa Essiedu反而將其轉化為動力：「呢啲謾罵反而激勵我，令我更熱衷將呢個角色塑造成屬於我自己嘅石內卜。回想我細個嗰陣，我會幻想自己騎住掃帚喺霍格華茲飛嚟飛去，一想到而家有啲同我一樣嘅小朋友，可以喺呢個魔法世界見到自己嘅影子。呢樣嘢正正係我嘅動力，令我唔會被嚇倒，繼續專注去完成令自己引以為傲嘅作品。」佢亦提到自己細個因為媽媽冇錢請保姆，所以經常帶佢去圖書館，令佢愛上咗《哈利波特》，雖然未睇過電影版，但小說係佢童年嘅避風港。

HBO《哈利波特》劇集預計將於2027年喺正式播出第一季，並計劃用10年時間將J.K. Rowling嘅7本原著小說改編成7季。Paapa Essiedu形容呢個係一個巨大嘅承諾：「拍完嗰陣我都已經45歲啦，我知道我嘅人生將會有翻天覆地嘅變化，我甚至可能會喺劇集完結前就做埋爸爸，但我只能夠順應這一切。」