雖然俗語有話「禮多人不怪」，但Dakota Johnson就偏偏因為太有禮貌而痛失演出機會。佢最近接受訪時透露，曾經喺一次試鏡中主動同人握手打招呼，點知事後竟被批評「自大」同「愛攀關係」，最終無緣入選。

Dakota Johnson日前作客《Hits Radio》節目宣傳新戲《Splitsville》時，分享咗一次相當無奈嘅試鏡經歷。佢表示當時參加第二輪試鏡：「我行入去間房，跟住同所有人握手兼自我介紹。然後我演完場戲就走咗。」點知事後收到嘅反饋竟然係，因為佢主動行過去同大家握手同自我介紹，劇組覺得佢「自大（pompous）」、「愛攀關係（schmoozing）」兼「自以為是」。

對於呢個評價，Dakota Johnson坦言當時完全係滿頭問號：「我當時心諗『What?』我攞唔到個角色，係因為佢哋話我太過傲慢自大？但我只係出於禮貌咋喎……件事真係好瘋狂。」（Btw：如果佢嗰次落選係《蜘蛛夫人》，咁可能反而係件好事呢。）

講返佢嘅近況，由佢主演兼擔任監製嘅黑色愛情喜劇《Splitsville》現正於英國上映（美國已於去年8月上映，目前可於Hulu收看）。故事講述一對夫婦宣布離婚後，引發嘅連串混亂，探討開放式婚姻嘅後果，同片仲有Adria Arjona、Kyle Marvin、Nicholas Braun等演員。 另外，佢嚟緊仲會同Anne Hathaway及Josh Hartnett聯手主演由Michael Showalter執導、改編自同名暢銷小說嘅新片《Verity》，各位影迷敬請期待。