早前港鐵因為唔畀學生帶古箏、大提琴等等大型樂器上車，結果畀全港市民鬧爆，話佢哋大細超，見到水貨客帶大型行李就視若無睹，係要搞班音樂人先安樂！哎呀！你哋有所不知喇！大提琴佢外表係大提琴，但其實佢有另一個蠱惑真面目，係港鐵職員咁叻豬先預先睇穿！

大提琴本體已經好大，用嚟保護佢嘅提琴袋或者提琴箱當然要再大一個Size啦！拎住咁巨型嘅樂器，除咗造成演奏者嘅困擾，仲可能會影響同車乘客。講嘅唔係行李太大撞到人阻住人咁簡單，而係進一步更霸道嘅行為！

就係將自己塞入大提琴袋入面，當睡袋咁瞓！！！最近有一位日本網友喺Twitter上分享瞓喺大提琴箱入面嘅舒適感受，立刻引起其他演奏者爭相嘗試，甚至有網友表示，其實大提琴演奏者巡迴演出時，可以喺大提琴袋入面瞓得特別好已經唔係咩特別事，行內人士個個都知。