搵食艱難，香港行行都難撈，想轉過份工？算吧啦，香港工種有限，份份工都差唔多，想有一啲新凸破，自己起家搞盤特別啲嘅生意，又未必人人接受到。其實世界咁大，應該大開眼界，職業唔係得嗰幾種，仲有好多新突破！睇吓最多千奇百趣事情發生嘅日本，有啲咩古靈精怪職業啦！

大叔(Ossan)出租
「大叔出租」係日本最新嘅出租服務，每個鍾1000日元，就可以租到一名中年大叔。租個中年大叔有乜用？大叔主要提供嘅服務就係陪吓打機、行街、做跟班、傾偈等等。出租方法好簡單，顧客只需要選定符合自己要求嘅大叔，再好似淘寶咁，加入電子購物車，最後付款就搞掂。另外仲有「大叔出租」熱線服務，提供大叔嘅聯繫方式，大叔就會每日24小時on call，為顧客戶提供溫馨服務，認真唔易做。

不過講就講到好似大把大叔畀客揀，但其實呢個大叔出租服務嘅公司Ossan Rental剛剛成立無耐，所以只得2個大叔可供選擇。一個係Osaka 大學講師，47歲嘅Takanobu Nishimoto；另一個係前棒球運動員MikioSendou。一個文靜一個好動，滿足不同女士嘅需要。

被美女辱罵
就好似《監獄學院》入面嘅男生都enjoy畀副會長S咁，畀美女辱罵對某啲男人而言係可以帶來快感。所以日本就推出一系列電視節目《我想被一名美女怒罵》，每集請來唔同美女，對住鏡頭喪鬧人5分鐘。

當中美女泳裝模特兒吉木理沙，仲因為火力十足，喺鏡頭前鬧到臉容扭曲而爆紅。佢一連串係咁鬧︰「望咩望？死淫蟲！」、「都一把年紀仲被漫畫影響？」、「同後生女飲酒笑到成個白痴咁，不如好好培育自己嘅部下啦！」等等金句，都令男士勁興奮，完全滿足被虐癖嘅男人！